نیویورک اوتورومو ایله باغلی گونئی آزربایجان ایستیقلالچیلاربیرلیگینین موراجعتی

عزیز میللتیمیز
هرکسین بیلدییی کیمی منطقه میز جیددی بیر بوحران ایچینده دیر . خصوصیله ایران دئییله ن میللتلر دوسداغیندا ایش سیزلیک، باها‌‌‌لیق، باسقی و تئرور و قانونسوزلوق حوکم سورمکده ، کیمسه ـ کیمسه نین عریضه سینی اوخوماماقدادیر .اینفیلاسییا شیددتی مین قاتی کئچمکده دیر. رئژیمین اوز ایچینده بئله، سورتوشمه لر دوام ائدیر. باشقا بیر سوزله دئسک ایران دئییله ن یئر بیر دوغوم سانجیسی کئچیرمکده دیر. رئژیم ده ییشمه سی یاخود موجود رئژیمین ایچینده ده ییشیکلیکلر آپاریلماسی احتمالی چوخدور. طبیعی اولاراق تئهران رئژیمی و اونو حاکمییته گتیره ن اربابلاری اوز پروژه لرینی ایجرا ائتمک اوچون سوزده ایران موخالیفتی ایله دانیشیقلار آپارماقدا ، اونلارین ایچینده ن اوز چیخارلارینی تأمین ائده بیله نلری سئچمه یه چالیشماقدادیر. بو آرادا غئیر فارس میللتلری ده بو اویونا گتیریب، حمایه سینی قازانیب، ایغنا ائتنمک پئشینده دیر. ائله بونا بیر نمونه سئپتامبر آیی نین ۲۴ ـ ۲۵ ده موجاهیدلرین گیزلی الی و سعودی عربستانین مالییه سی ایله کئچیر یله ن توپلانتی دیر. تاسوفله بیر نئچه سویداشیمیزدا مسئله نین ماهیتینی نظره آلمادان بو توپلانتی یا قاتیلیب ، قوندارما ایران خاریتاسینی بویونلارا سالیب، آمئریکالیلارین (ایتیلین منیم اولکه مدن گئدین سوزونو!!!) ائشیده ـ ائشیده اونلارلا شکیللر چکدیرمه یی باشاری آدلاندیرمالاری اوتاندیریجیدیر. یاخشی اولاردی کی، بو سویداشلاریمیز بیرداها گئرییه قاییداراق اورتاقلیق ائدیکلری اوتورومون ماهییه تینی یئنیدن ده یرلندیرسینلر. یوخسا بو سویداشلاریمیز ین ایستیقلالچیلارا سالدیرمالاسیله گرچکلرین اوستو اورتولمز! بیز سویداشلاریمیرین هر هانسی بیر سببله قطعنامه یه قول چکمه مه لرینی مثبت ده یرلندیریریک. بو اولوملو داورانیش نیویورکدان گلن تکجه تسللی خبر ایدی. ان آزیندان موجاهیدلرین وئردیکلری قطعنامه ده آذربایجان تورکلری نین امضاسینین اولماماسی موصبت ساییلابیلر.
بیز ایستیقلالچیلار اولاراق بونو قئید ائتمک ایسته ردیک کی ، بئین الخالق قوروملار طرفینده ن قورولان توپلانتیلارا قاتیلیب میللتیمیزین سسینی چاتدیرماقلا موخالیف اولماییب ، عکسینه گئتمه نین طرفدارییق. حتا بئله بیر توپلانتیلاردا ایرانچی گروپلارین اولماسی بئله بیزی علاقه لندیرمیر. آمما بیز ایستیقلالچیلار کسین لیکله ایرانچی قوروملار طرفینده ن قورولان و مالیه لیشدیریلن ایجلاسلارا قاتیلمانی رد ائدیریک، ائله بو سویداشلاریمیزدان دا بونا گوره انتیقاد ائدیریک، انتیقاد دوشمنچیلیک معناسی داشیمیر.
بیز ایسیقلالچیلار اولاراق اوز میللتیمیزه سسله نیب ، بو گونلرده چوخ آییق اولمالارینی ایسته ییریک. رئژیمین اوزو طرفینده ن سوزده آشکار فعاییت ائده ن قوروملارین یارادیلماسی احتمالی اولدوغو کیمی ، رئژیمین اربابلاری طرفیندن ده بیرعده آذربایجان تورکلرینی چئشیدلی (لنده ن گئچیش توپلانتیسی، فئدرالچی، مشروطه چی و سایره) آدلار آلتیندا بیر آرایا گتیریب کئچمیشلرده اولدوغو کیمی اوز سیاستلرینه آلت ائتمکله یاناشی آذربایجانلیلاری پارچالاییب، ایرانچیلیغا یونلندیریب، مقدس هدفیمیز اولان ایستیقلالییت یولوندان آزدیریب ، موجود مستعمره و ایشغال حیاتینی سوردورمه یه چالشماقدادیرلار. هر زامان اولدوغو کیمی، یئنه ده پول، مقام، عنوان دوشگونو اولان اوز سویداشلاریمیزدان یارارلانماق ایسته ییرلر.

گونئی آزربایجان ایستیقلالچیلار بیرلیگی(گایب)
۰۴.۱۰.۲۰۱۹

Your email will not be published. Name and Email fields are required