گونئي آذربايجانين ايستيقلالچيلار بيرليگينين رهبرلري ايسوئچين خاريجي ايشلر ناظيرليگينده گؤروش کئچيريبلر

گادتب: دونن 2018-جي ايل ماي آيينين 21-ده گونئي آذربايجانين ايستيقلالچيلار بيرليگينين رهبرلري ايسوئچين خاريجي ايشلر ناظيرليگينده اولوبلار. گؤروشده گايب-نين باشقاني سايين اژدر تاغيزاده (گادتب باشقاني)، گايب رهبرليگيندن سايين صالح ايلديريم (گايپ باشقاني)، سايين آيدين مارالانلي (گاميت) و گايپ-ين آوروپا سوروملوسو سايين صمد فرتاش ايشتيراک ائتميشلر.

ايسوئچ خاريجي ايشلر ناظيرليگينين اورتا شرق و ايران آدلانان يئر اوزره مسئولو ايله باش توتان گؤروشده گونئي آذربايجان ايستيقلالچيلار بيرليگينين باشقاني سايين اژدر تاغيزاده گونئي آذربايجان حقيقتلري باره‌ده ايسوئچلي رسميلره معلومات وئرميشدير. باشقان گونئي آذربايجاندا تورکلرين قديم تاريخه ماليک اولدوغو، 40 ميليونا ياخين آذربايجان تورکونون ايران آدلانان اؤلکه‌نين ايشغاليندا اولان گونئي آذربايجاندا ياشاديغي و بوتون حقوقلاريندان محروم ائديلديگي باره‌ده معلومات وئريلميشدير.

گايب-ين رهبرلريندن سايين صالح ايلديريم ايسه بيلديريب کي، ايران 1946-جي ايلده گونئي آذربايجاني ايشغال ائديب و سويقيريم تؤره‌ديب. بو گون خالقيميزا قارشي معنوي سويقيريم سياستي داوام ائدير. آذربايجانليلارين بوتون حوقوق و آزادليقلاري تاپدانيب.

گايب-ين رهبرلريندن سايين آيدين مارالانلي ايسه گونئي آذربايجاندا آزادليق اوغروندا حرکاتدان دانيشاراق، خوصوصيله سون ايللرده داوام ائدن گونئي آذربايجان حرکاتيندان معلومات وئرميش، 40 ميليون آذربايجان تورکونون بوتون حقوقلاريندا محروم ائديلديگيني وورغولاميشدير. او قئيد ائتميشدير کي، ايسوئچ دؤولتي گونئي آذربايجانلا باغلي بو حقيقتلري نظره آلماليدير.

گونئي آذربايجانين ايستيقلالچيلار بيرليگينين رهبرلري بيرليکده قئيد ائتديلر کي، 40 ميليون آذربايجان تورکو اؤز حقوقلاريني الده ائتمک و ايشغالچي فارسلاري گونئي آذربايجاندان چيخارماق نيتينده‌دير. ايسوئچ رهبرليگي ده بو مسئله و اؤز معنافعييني نظره آلماليدير. گؤروشده قئيد اولوندو کي، ايسوئچ دؤولتي گونئي آذربايجاندا رئژيم طرفيندن اينسان حاقلارينين کوبود شکيلده تاپدانديغيني نظره آلماليدير.

ايسوئچ خاريجي ايشلر ناظيرليگينين اورتا شرق و ايران آدلانان يئر اوزره مسئولو ايسه بيلديردي کي، ايسوئچ رسميلري هر زامان بمت-نين اينسان حاقلاري تشکيلاتلاريندا ايراندا، ائله جه ده اينسان حاقلاري پوزولان سایر اؤلکه‌لرده اينسان حاقلاري مسئله سيني گوندمه گتيرير. ايران آدلانان يئرده رئژيمين مسئوللاري ايله گؤروشنده ده اينسان حاقلاري مسئله سيني اؤنه چکيلير.

گونئي آذربايجانين ايستيقلالچيلار بيرليگينين رهبرلري قئيد ائتديلر کي، ايسوئچ رسميلري ايران آدلانان يئره گئدنده تبريز، اردبيل، اورمييايا و سایر آذربايجان شهرلرينه گئتميرلر کي، اورادا ياشايان ميلتيميزين دورومونو گؤرسونلر.

ايسوئچ خاريجي ايشلر ناظيرليگينين اورتا شرق و ايران آدلانان يئر اوزره مسئولو سوندا قئيد ائتدي کي، بيز سيزينله هر زامان گونئي آذربايجان مسئله سي ايله باغلي فيکير موباديله‌سي آپاراجاغيق. سيز ده هر زامان ايسته‌سنيز بو باره‌ده بيزيمله گؤروشه و بيزه آذربايجان حقيقتلريني چاتديرا بيلرسيز. بيز ده اؤز ايشلرميزده بونو نظره آلاريق.

Your email will not be published. Name and Email fields are required