گونئي آذربايجانين ايستيقلاچي تشکيلاتلاريندان آذربايجان تورک ميللتينه چاغيريش: رئفراندوم حيله سي ايله رئژيمي قوروماق ايسته‌ين ايرانچيلارا آلدانما

ايرانين ايشغالچي و عيرقچي رئژيمي، اؤز حاکيميتينين ضعیف و ان آغير دؤورونو ياشاماقدا، ائله جه ده سون نفسلريني چکمکده‌دير. غئيري-فارس ميللتلرين قورتولوش مباريزه‌سي بو ايشغالچي رئژيمي چيخيلماز وضعيته سالان اساس عاميلدير. بونونلا ياناشي ائکونوميک (ايقتيصادي) بؤحران سيراوي وطنداشلارين بئليني سينديرماقدادير. عئيني زاماندا بين الخالق باسقي و تضييقلر آرتماقدادير. بوتون بو عاميللر رئژيمين ايچينده جيدي ايختيلافلارين يارانماسينا سبب اولماقدادير. جينايتکار و موستملکه‌چي رئژيم بو پروبلئملري چؤزمه‌يه، حل ائتمه‌يه قادير دئييلدير. باشقا سؤزله دئسک، بونلار ايشغالچي رئژيمين کسين يئنيلمه‌سينين خبرچيسيدير. بو بؤحراندان قورتولوش ايمکاني اولماديغيني درک ائدن ايران ايشغالچي رئژيمي ال- آياغيني ايتيريميش حالدا سون کارتلاريني بير-بير اويناماقدادير. هم حاکيميت، هم سؤزده موخاليفت طرفيندن هر هانسي راديکال و يا اينقيلابي دگيشيم سونوجوندا ايران آدلانان يئرين پارچالاناجاغي داواملي وورغولانيب، اوزرينده دورولماقدادير. حتّي بو پارتلاييشين قاباغيني آلماق اوچون حاکيميت و موخاليفت بيرگه حرکت ائتمکده‌دير. بونا گؤره ده سون واختلاردا غئيري-فارس ميللتلره عاييد ايستيقلالچي تشکيلاتلاري هدف آلميشلار، ايران مرکزلي حرکتلرين اؤنونو آچيب، خوصوصيله گونئي آذربايجان ميللي حرکاتيني، ايران مرکزلي حرکته چئويرمک اوچون رئفراندوم شعاريني اورتايا آتيرلار. باشقا سؤزله دئسک، رئفراندوملا ايران ايشغالچي رئژيمينين دئوريلمه‌سيني انگلله‌ یه رک، سيستئمي قوروماق، يوموشاق دگيشيکليکلرله، ايرانين داغيلماسينين قارشيسيني آلماق ايسته‌ييرلر. اونلار مؤوجود ايشغالي داوام ائتديرمک اوچون، چئشيدلي اويونلار اويناييرلار. رئژيمين چؤکوشو ياخينلاشديقجا رئفراندوم سؤزو داها چوخ گوندمده اولاجاق. اؤز ايچيميزدن اولان آد و عنوان دوشگونلريني ده اؤز يانلارينا آليب، ايستيقلالچيلارا قارشي يارارلاناجاقلار.

گونئي آذربايجانين ايستيقلاچي تشکيلاتلاري آذربايجان تورکونو بو فيتنه کارليغا قارشي تدبيرلي اولماغا، دوشمنلرين اورتايا آتديغي بو يالانلارا آلدانمادان، اؤز قورتولوش ساواشيني داوام ائتديرمه‌يه چاغيريريق. بيز ايستيقلالچيلار ايران آدلانان رئژيمي بو و يا هر هاسي بير آد و ماهيتده اولسا بئله قبول ائتميريک و ائتميه‌جه یيک. بيزيم اوچون يئگانه آلتئرناتيو يول گونئي آذربايجان موستقيل دؤولتينين قورولماسيدير. بو سببدن بوتون ايستقلالچيلارا و ميللي قووّه‌لره موراجيعت ائديب، ايش بيرليگينه چاغيريريق.

ردّ اولسون عيرقچي و ایشغالچي فارس

ياشاسين موستقيل گونئي آذربايجان

Your email will not be published. Name and Email fields are required