گونئی آذربایجان ایستقلالچیلار بیرلیگینین آذربایجان میللی حرکاتینا سیزدیریلان ایرانچیلارلا باغلی بیلدیریشی

حؤرمتلی وطنداشلار

هر جهتدن ورشکست دوشوب، عؤمرونون سونو گلمیش ایرقچی، تئروریست تئهران رئژیمی نین یاراتدیغی جهنمین سیزلر شاهیدیسینیز، هر کئچن گون هر ساحه ده آرتان و دوزولمه یه جک آغیر شراییط آلتیندا یاشاماق زورونداسینیز. بو موجود وضعیت دینسیز، اخلاقسیز تئروریست رئژیمینی ایلگی لندیرمیر. خصوصیله رئژیم اؤزو ده عمرونون سونو گلدی یینی درک ائدیر. ائله بونا گؤره ده گونده لیک رئژیمین ایچینده سورتوشمه و پایلاشما داوالاری نین شاهیدی ییک. البته اؤلکه خاریجینده ده سؤزده ایران موخالیفتی ایچینده ده رقابت و آلترناتیولیک یاریشلاری سودورولمکده دیر. تأسوفله سؤزده اؤزلرینی آذربایجانلی بیلن آمما اؤزلویونو ایتیرمیش و آسیمیله اولموشلار ایرانچیلارا یالتاقلانماقلا و قوللوقچولوق ائتمک له اؤزلرینه بیر پای چیخماق ایسته ییرلر.

بو چوخ سئویندیریجی دیر کی ،آذربایجان اؤرتوگو آلتیندا ملی حرکته سیزمیش، یاخود سیزدیریلمیش اؤزوموزدن اولان ایرانچیلارین گئت ـ گئده اووجلاری آچیلماقدادیر. اونلار اؤز حقیقی اوزلرینی گؤستریب ، ایرانچی فارس ایرقیچیلاری ایله بیر آغیزدان دانیشیرلار.

سؤزده اؤزلرینی «تورکچو، میللتچی»، آدلاندیران و «ایران تورکلری نین» وصی- قیومو سایان بو آغالار«آماندیر ایران» داغیلماسین دئییرلر، اونلار ایرقچی فارسلارین مستعمره سینده، ایشغالی آلتیندا یاشاماغی مستقیل آزاد یاشاماغا ترجیح وئریرلر. دیققتی چکن بودور کی، بو اؤزونه ، اؤزلویونه غنیم کسیلن لر، ایرانچی لارین هر ایکی جبهه سینده موجوددورلار، خصوصیله کئچن سون ایل عرضینده بو گروپلاشمالار آیدینجا گؤزه چارپماقدادیر .

میللتیمیز بو آغالارین نئجه دییرلر ایران (فارس) موخالیفتی نین، یاخود موجاهیدلرین، شاهچیلارین و اونلارین آیری آدلار آلتینداکی گروپلاری نین پئشینه دوشوب، حتا بویونلارینا ایران خاریتاسی نی آسیب، ایرقچی فارسلارین « ای ایران ای مرز پور گهر» سرودلارینی اوخومالاری نین شاهیدیدیر.

اورتایا آتیلمیش بیر نوخود کیمی، جیت قوز کیمی میللتیمیزین دوشمنلریله اوتوروب، آذربایجان میللتی نین آدیندان دانیشیرلار، آل- وئرچی لیک ائدیرلر. میللتیمیزین سوروشما حاقی واردیرکی: سیزلر کیملرسینیز، بو حاقی کیم سیزه وئرمیشدیر کی، آذربایجان میللتی آدیندان دانیشاسینیز؟.

طبیعی اولاراق سوروشا بیلرلرکی، ایرانچییلیغی مودافعه ائده ن، میللتمیزین دوشمنلرایله اوتوروب دوروب، اونلاردان مرحمت دیله ننلر، اؤزلرینی میللتچی آذربایجانچی، تورکچو آدلاندیرا بیلیرلرمی؟

آذربایانچیلیغا عملده دال چئویرن بو آغالاری، ایرانچیلارین هر ایکی جبهه سینده (حاکمیت و موخالیفت) گؤرمک مومکوندور. هر ایکیسی ده ایران آدلانان میللتلر دوستاغی نین داغیلماسینی ایسته میرلر. سؤزده بیزیمکی لر، آمما عملده ایرانچیلارلا بیرگه (ایستقلالچیلارین) علیهینه بیرلیکده حرکت ائتمکده دیرلر. بیر طرف گله جک حاکمیتدن پای آلماق و او بیری طرفدن ده موجود حاکمیتی قوروماق اوچون میللی حرکتین ایچینه سیزمیش و سیزدیریلمیشلار.

مجاهید و سلطنت چی لرله بیرلیکده باشقا بیر ایران قورمالییق دئییرکن، باشقا طرفدن ده اطلاعاتین گؤستریشی ایله بو فیکری یایماغا چالیشیرلارکی، ایران موخالیفتی حاکمیته گلیرسه ضیعیفله میش بو رژیمین یئرینده محکم ببر پان ایرانیست دولت یاراناجاقدیر. او زامان تورکلری داهادا چوخ سرکوب ائدیله جکلر. بئله لیکله کئچن ۴۰ ایلده، میللتیمیزه قارشی دوشمنچی لییینی ثابیت ائدیب، اؤلکه میزی دارما-داغین ائده ن، میللتیمیزه قان قوسدوران رژیمی قوروماغا چالیشیرلار.

آمما دونیامیز ده ییشمیشدیر، هر ایکی طرف ده بیلیر کی، بو رژیم ایران اوچون سون رژیم اولاجاقدیر. ایران آدلانان یئرده ایسته ر داخیلدن، ایسته رسه ده ائشیکده ن آپاریلان بیر ده ییشیک لیک بوگونکو شراییطین دوامینا اجازه وئرمییه جکدیر. گونئی آذربایجان تورکو و باشقا فارس اولمایان میللتلره اوز حقوقلارینی الده ائدیب، اوز دولتلرینی قورماق اوچون شرایط یاراناجاقدیر.

بیز آذربایجان ایستیقلالچیلاری بونا اینانیریق کی، میللتیمیزین ایراده سینه دایاناراق مستقیل گونئی آذربایجان دوولتی قورولاجاقدیر، آنجاق اوزو قارالیق اؤزگه لرین پئشینه دوشن میللتیمیزین دوشمنلرینه یالتاقلیق ائده نلره قالاجاقدیر.

نتیجه اعتباریله گونئی آذربایجان میللی حرکاتینا سیزمیشلاری تانیماق چوخ دا چتین دئییلدیر، یئترکی اونلارین اورتایا آتدیقلاری ایرانچیلیق شعارلارینا باخیلسین. بو اونلاری تانیماق اوچون بیر آچاردیر: ایران امروز، ایران فردا، ایران دمکراتیک، ایران کمونیست، ایران فدرال، ایران تورکلری … و ساییره بونلارا بنزه ر، ایران ائکی (پسوندی ) داشییان شعارلار، میللتیمیزین دوشمنلری نین شعارلاردیرلار. میللتیمیزی ایرقچی فارسلارین، ایرانچیلارین مستعمره سینده، ایشغالیندا ساخلاماغا خیدمت ائدیرلر. بوندان باشقا آیری بیر ایضاها احتیاج یوخدور.

Comments are closed.