گونئی آذربایجان ایستقلالچیلار بیرلیگینین یئنی گون- بهار بایرامی مناسبتی ایله میللتیمیزه تبریک مئساژی

تورک میللتی بوتون ساحه لرده ایله ریجی گوروشلرله تاریخ و مدنییت ده قالیجی ایزلر بوراخمیشدیر. تورک میللتی ایستر قادینا ائشیت باخیش و داورانیشلاری، ایستر دؤلتچیلیک و امپراطورلوقدا سؤموروجولوک آنلایشی ایله یوخ، ائشیتلیک ایلکه سی ایله اداره ائتدیگی دؤولت لرده، میللتلرین دیل و دینلرینه توخونماماق و اورادا یاشایانلارا ائشیت حق تانیماقلا بیزه شانلی بیر عنعنه میراث قویموشدور. بو گون چاغداش اؤلکه لرده دوغایا وئریلن اهمیت، مدنیت ساییلارکن، بیزیم اجدادیمیز اؤز دوشونجه و ایدئولوگیالارینین تملینی دوغایا سایغی ایله قوروب، شامانیزم فلسفه سینی دونیایا تقدیم ائدیبلر. اجدادلاریمیزین دوغایا وئردیک لری اهمییت و سایغی، طبیعتین قیش موسیمیندن چیخیب، بهار ایله یئنی بیر حیات یاشاماسینی، یئنی گون- بهار بایرامی، اوغوز بایرامی و… آدلاندیردیلار. اونلار دوغانین یئنیدن دوغوشونو ایللین باشلاندیغی گون کیمی قبول ائتدیلر. بو گون باشقا مدنیت لرده یئنی ایل آنلایشینا باخارکن دینی گوروشلرین ایزینی داها قاباریق شکیلده گؤردوگوموزده، اجدادلاریمیزین نه قدر رئالیست و اوزاق گؤرن اولدوقلاری بیزی بیر یاندان غرورلاندیریر، بیر یاندان دا سوروملولوغوموزو بیر آز دا آرتیریر. گونئی آذربایجان ایستقلالچیلار بیرلیگی اولاراق یئنی گون – بهار بایرامی مناسبتی ایله میللتیمیزین بایرامینی تبریک ائدیب، سؤز وئریریک قانیمیزین سون داملاسینا قدر، اونلارین قورتولوشو و تورک میللتینین لایق اولدوغو دؤلتچیلیگی اوغروندا مبارزه آپاراق. گلین تشکیلاتلانیب، سیستماتیک مجادیله ایله عیرقچی و ایشغالچی دوشمنی اؤلکه میزدن آتاق. گئرچک بایرامی یاشاییب، گله جک نسلیمیزه مستقیل، آزاد، چاغداش و دئموکراتیک بیر اؤلکه ارمغان ائدک. یئنی گون بایرامینیز مبارک اولسون!

Your email will not be published. Name and Email fields are required