گونئی آذربایجان ایستیقلالچیلار بیرلیگینین گونئی آذربایجاندا میللتیمیزه چاغیریشی

گونئی آذربایجان ایستیقلالچیلار بیرلیگینین گونئی آذربایجاندا میللتیمیزه چاغیریشی

میللتیمیز اؤز، گونلوک حیاتیندا اؤلکه ده اولان سیاسی، اقتیصادی و اجتماعی بؤحرانین شیدّتلندیگینین شاهیدیدیر.
قیتلیق، باهالیلیق ، ایش سیزلیک، میللتیمیزین بئلینی سیندیرماقدادیر. حتا سیراوی وطنداشلاریمیز گونلوک یاشانتی لارینی کئچیرمکدن بئله عاجیز دوروما دوشمکده دیرلر، بوتون بونلار ۴۰ ایل ایسلام کؤینه یینه بورونموش ایرقچی ـ ایشغالچی رئژیمین محصولودور. بوآغیر اقتیصادی بؤحران یالنیز ایشغال و موستملکه ده اولان گونئی آذربایجان و دیگر غیر فارس میللتلری یوخ، حتّا فارس میللتینی ده ائتکیله مک ده دیر.
سون آیلاردا اجتماعی، سیاسی و اقتیصادی بؤحران اؤزللیکله سؤزده میلّی پولون دوشوشو، یوک ماشینی سوروجولرینین اعتصابلاری و آمریکا دؤولتینین رئژیمه قارشی تحریم و بیر سیرا حرکت لری میللتین صبرینین داشماسینا سبب اولموش.
کئچه ن هفته ایچینده باشلایان اعتیراضلار ایسه گئت ـ گئده وسعت آلماقدادیر. بو گونه کیمی اعتراضلار داها چوخ فارس بولگه لرینده باش توتموش و غیر فارس بؤلگه لر، خصوصیله گونئی آذربایجانیمیزدا معنالی اولاراق سس سیزلیگین شاهیدی اولوروق . طبیعی اولاراق بو سس سیزلیک جینایتکار رئژیمین تصدیقی معناسینا گلمیر، ترسینه آذربایجان ۱۰۰ ایلدیر کی، ایشغالچی حاکمیت لرین الی آلتیندا ان آغیر اقتیصادی، سیاسی، اجتماعی و کولتوره ل باسقی و فشار آلتیندادیر.
قهرمان خالقیمیزین تمکینلی حرکت ائتمه سی، مسئله یه دویغوسال یاناشماماسی بیزجه کئچمیشدن آلدیغی آجی تجروبه لرین نتیجه سیدیر. چونکی هر زامان مسئله یه احساساتلا یاناشدیقدا میللی ایستکلریمیز فارس حاکمیتلری نین خئیرینه قوربان وئریلمیشدیر. بونون آچیق نمونه سی شاه رئژیمی نین، خمینی رئژیمی ایله ده ییشدیریلمه سیدیر. او زامانلار عینی بوگون کیمی ایرقچی – ایشغالچی پهلوی سلاله سینه قارشی، اوز میللی منافعیمیزی نظره آلمایب، حرکت ائتدیگیمیز اوچون، حاکمیت ده ییشسه ده ایرقچی سیستمین باشقا بیر آد ایله دوام ائتمه سی، میللتیمیزین ۴۰ ایل داها ایشغال آلتیندا قالماسینا سبب اولدو.
کئچمیشدن درس آلان میللتیمیز بو دفعه کوچه و خیابانلارا چیخدیقدا داها تئهراندا رئژیم ده ییشمه سی اوچون، یاخود رئژیمین یئرینه گلمک ایسته ین تانینمیش ایرقچیلار اوچون یوخ بلکه اوز حاقلارینی الده ائتمک اوچون، موباریزه مئیدانلارینا چیخاجاقدیر. آذربایجان میللتی نین داها یولو بللی دیر. ایستکلری ده مشخص دیر. میللی شاعریمیز اعتماد دئمیشکن: بو دفعه یولوموز تئهراندان آیریلیر. مستقیل گونئی آذربایجان جمهورییتینی یاراتماق اؤز موقددراتیمیزی اؤزالیمیزه آلماق اوچوندور. طبیعی اولاراق وئریله ن شعارلاریمیز بو ایستیقامتده اولاجاقدیر. یعنی میللتیمیز سس سیز قالمییاجاقدیر، عکسینه بو دفعه داها ایناملی بوتون موباریزه اصول لارینا دایاناراق کوچه و خیابانلارا چیخاجاقدیر.
گونئی آذربایجان ایستقلالچیلار بیرلیگی میللتیمیزین ایستک و بین الملل شرط لری گؤز قاباغینا آلاراق، میللتیمیزی اؤز شعار و میللی ایستک لری ایله ایرقچی رئژیم و اونون سؤزده اپوزیسیونونا قارشی اعتراضا دعوت ائدیر، شبهه سیز گله جک بیزیم دیر. اونوتمایالیم هر یئرده و هر زاماندا حاقلاریمیزی ایستمک حاقیمیزدیر.
یاشاسین آذربایجان
رد اولسون ایرقچی-ایشغالچی رئژیم و اونون سؤزده اپوزیسیونو!
گونئی آذربایجان ایستیقلالچیلار بیرلیگی
۱۴.۰۵.۱۳۹۷

Your email will not be published. Name and Email fields are required