گونئی آذربایجان ایستیقلالچیلار بیرلیگی نین گونئی آذربایجاندا خورداد قیامی ایله باغلی بیلدیریشی

شبهه سیز هر میللتین کئچمیشینده بویوک و تاریخینی ده ییشدیره ن حادیثه لر اولموشدور. گونئی آزربایجاندا تورک میللتینین ده سؤزسوز کی بئله بویوک تاریخی حادیثه لری (اولقولاری) اولموشدور.

اولو بابکین دیره نیش بایراغینی قالدیرماسی، ستارخانین تبریزده آغ بایراقلاری ائندیرمه سی، خیابانی نین آزادیستان جمهورییتینی اعلان ائتمه سی، پیشه وری نین میللی حوکومت قورماسی و خلق مسلمان حرکاتینین ولایت فقیه و اونون مطلق حاکمیتینه قارشی باش قالدیرماسی مسئله لری تاریخیمیزده اؤزونه خاص یئری اولماقلا یاناشی میللتیمیزین ایراده سینین و آزادلیغا اولان اینامنین سمبولودورلار. خورداد قیامینا گلدیکده ایسه بو قیام، میللی هدف لری بللی اولان، کیملیگیمیزی قورویان و میللی منافعیمیزی دوشونن بیر حرکت اولماقلا یاناشی قورتولوش مجادیله میزین دیره نیش مرحله سینین باشلانقیجی و هر آچیدان اوزونه خاص بیر یئری اولان حرکت اولوب. طبیعی اولاراق کئچمیشده کی تاریخی حادیثه لردن درس آلیب، ایمکان داخیلینده باش وئرمیش خطالارین قارشی سی آلینمالیدیر.

بیر خورداد قیامی ایللردیر ایشغالچی رئژیم و اونون حاکمیتی طرفیندن ائدیله ن توهین، تحقیر و اریتمه (آسیمیلاسیون) سیاستلرینه اعتیراض ایدی. هم ده بو قیامین باش وئرمه سی میللتیمیزین اراده سی قارشیسندا رژیمین همین منفور سیاستینین تاثیرسیز اولدوغونون اثباتیدیر.

بیر خورداد قیامیندا قهرمان آذربایجان تورک میللتینین هارای ـ هارای من تورکم دئمه سی بو مقدس یولدا چکیله ن زحمتلرین، تؤکولن قانلارین، دوسداقلاردا ایشگنجه ائدیلیب، لاکین دوشمنه سیر وئرمه ین قیز و اوغوللاریمیزین چکدیکلری امکلرین بوشا گئتمه دیگینین گؤسترگه سی، ائله جه ده قورتولوش و باغیمسیزلیغیمیزین جارچسی اولموشدور.

تاریخ یارادان میللتیمیز!

سیزین دیره نیشینیز و اؤز میللی وارلیغینیزا صاحیب چیخمانیز، بوگون بوتون دونیا اؤلکه لرینین باخیشینی بو ایرقچی – تروریست رئژیمه ده ییشدیرمیش، هر آن ایران آدلانان میللتلر دوسداغیندا کؤکلو ده ییشیکلیکلر باش وئره بیلیر، آرتیق حاکمیتین مقبولییتی قالمایب و ایقتیصادی باخیمدان زور دورومدادیر. آرتیق رئژیمین تئرور – باسقی و یئرتیجی گوجلری محمد ریضانین گارد جاویدانی کیمی میللتلرین اراده سی قارشیسندا بوز کیمی ارییب، یوخ اولاجاغی هر کسه معلومدور. تک سؤزله دئسک بو رئزیمین ایشلتمه(استفاده) تاریخی سونا گئلمیشدیر.

بو دورومدا بیز نه ائتمه لی ییک؟

بیزیم سون ایستک و یولوموز بللی دیر، داوامیز آزادلیق و ایستیقلالییت داواسیدیر، بو هدفه چاتماق اوچون بیرلیکده حرکت ائتمه لی ییک، دوشمن بیزی پارچالاماغا چالیشیر، بیز ایسه داها چوخ بیرلشمه لی ییک ، میللی تشکیلاتلار آراسی امکداشلیق و ایش بیرلییی آرتمالیدیر و بوتون مباریزه یوللاریندان یارارلانمالییق، اؤزه للیکله قانونی مدافعه قوه سینی یاراتماق گونوموزون شرطیدیر.

۱خورداد شهید لریمیزین مقدس مزارلاری باشیندا حاضیر اولماق، شهیدعائله لرینی زیارت ائدیب، بوتون آزربایجان میللتی نین اونلارین یانیندا اولدوغونو، اؤلادلارینین اونودولمادیغینی و شهید عائله لرینین میللتیمیزین معنوی عائله لری اولدوقلارینی اونلارا آنلاتمالی ییق.

طبیعی اولاراق دوسداقلاردا ایشگنجه ائدیلن، لاکین دوشمنه سیرر وئرمه ین قیز و اوغوللاریمیز و شهید عائله لر ایله گؤروشوب، اونلارین آجیلارینی پایلاشیب یاردیمدا بولونماق هئچ شبه سیز هر بیر وطن سئوه رین میللی و انسانی وظیفه سیدیر. عین حالدا بیر خوردادین هدفلری ایسیقامتینده آدیم آتماق اوچون تشکیلاتلانماق و میللی استراتژی اورتایا قویاراق، بوتون گوجوموزو اونون اوغورلا باش وئرمه سی اوچون چالیشماق واجیب وظیفه لردن دیر. زیرا بیزی اؤز هدفیمیزدن اوزاقلاشدیرماق اوچون بویوک اویونلار پیلانلانیب و اویوقلانماقدادیر، بونا گوره ده آییق اولمالی ییق، غفلت ائدرسک، تاریخ بیزی هئچ بیر زامان باغیشلامییاجاقدیر.

بیزیم هدفیمیز گله جک نسلیمیزه موستملکه آلتیندا یاشاماق یئرینه، اونلارا آزاد ، مستقیل، دئموکراتیک بیر اؤلکه، رفاه ایچینده یاشاماق ایمکانی یارادیلمیش بیر توپلوم وئرمکدیر .

Your email will not be published. Name and Email fields are required