گونئی آذربایجان ایستیقلالچیلار بیرلیگینین ۲۸ مای آذربایجان خالق جمهوریتینین یارانماسی گونو مناسبتیله بیلدیریشی

یاشاسین ۲۸ مای آذربایجان جمهوريتینین یارانماسینین ۱۰۱ ایللیگی

هر بیر میللتین تاریخینده غرور وئریجی گونلر اولور. اما بعضی حادیثه لر واردیر کی، هم او میللتین گله جه یین ده بؤیوک ایزلر بوراخیر، هم ده باشقا میللتلره مثبت و یؤن وئریجی اؤرنه یه چئوریلیر.

شبهه سیز ۱۹۱۸-جی مای آیینین ۲۸-ده آزربایجان جمهوريتینین یارانماسی و استقلالیتین اعلان اولونماسی بئله بیر تاریخی گونلردن بیریدیر. شرق و اؤزللیکله مسلمان اؤلکه لری آراسیندا ایلک دئموکراتیک جمهورییتین یارانماسی و مدرن دوشونجه و کؤکلی ده ییشیک لیک لر او جومله:

ايلک پارلامئنتلی دولتین یارانیلماسی، ايلک دئموکراتيک، حوقوقا دایالی لائیک دولتین قورولماسی، ايلک دفعه قادينلارا سئچيم حوقوقو تانيماق و قادين – کيشی برابرليگينی تأمين ائدن جومهوريييت، آزاد سئچکيلر و… شرق دونیاسینداکی ارتجاعی باخیشلارا میدان اوخویان و آزادلیق سئور انسانلارا اؤرنک اولان بیر حادثه ایدی.

آذربايجان خالق جومهوريتی آوروپانين دئموکراتيک دگرلری ايله شرق مدنيتينين خوصوصيتلرينی بيرلشديرن يئنی بیر دولت و جمعيت نومونه‌سی اولموشدور.

۲۳ آی قیسا بیر زاماندا، حياتا کئچيريلن تدبيرلرله بنزری گؤرونمه میش کؤکلی ده ییشیک لیک لره امضا آتان دولت! اؤزللیکله مستقيل دولتچيليگيميزين اساسلارينين ياراديلماسی و گله‌جک اينکيشاف يولونون معينلشديريلمه‌سی باخيميندان مهم آدیملار آتمیشدیر. چوخلی اؤلکه لرده ایرقچیلیک و آیریمچیلیق وارکن یئنی دولتین ائتنيک و دينی منسوبيتدن آسيلی اولماياراق بوتون وطنداشلارين برابر حوقوقلارينين تانينماسی و بير چوخ آوروپا اؤلکه‌سيندن داها اول قادينلارا سئچکی حوقوقونون وئريلمه‌سی، آزربايجان ديلينين دولت ديلی اعلان اولماسی، تحصيل و مدنيتين اينکيشافينا خوصوصی ديققت گؤستريلمه‌سی دوستلاری سئویندیررکن طبیعی اولاراق استثمارچیلار و اونلارین ماشالارینی تدبیر گؤرمه یه و یئنی جمهورییتین نائلیت لرینین یایقینلاشماسینین قارشیسینی آلماغا یؤنلندیردی.

آزربايجان دئموکراتيک جمهوريتی آغیر ايجتيماعی-سياسی شرايطده ۲۳ آی یاشادی. ايکی ياشينی دولدورمادان خارجی دولتلرین یاشیل ایشیغی ایله هوجوما معروض قاليب و موقتی اولاراق دئوريلیب. یئنیدن روس اردوسو طرفیندن اشغال اولونسادا، ايستيقلال ايدئياسی يئنيلمه‌ييب، محمد امین رسولزاده نين “بير کره يوکسلن بايراق بير داها ائنمز” شعاریندا اؤز عکسينی تاپيب و نهايت ۱۹۹۱-جی ايلده روس ایرقچیلیگینین یاراتدیغی سؤزده بیرلیگین داغيلماسی ايله آزربايجان يئنيدن اؤز مستقيلليگينی اعلان ائتدی.

بو گون گونئی آزربایجانیمیزداکی قورتولوش مجادیله سی ۲۸ مای و ۲۱ آذر میللی حکومتین تجروبه لریندن درس چیخارداراق حرکت ائدیب، باغیمسیزلیق و بوتؤولشمه یولوندا هئچ بیرانگل تانیمادان میللیتین اراده و گوجونه دایاناراق آدیم-ادیم استقلالیت مفکوره سینین یایقینلاشماسی ایله باغیمسیز دولتچیلییه یاخلاشیریق. شانلی بایراغیمیزین ایسه باشکندیمیز تبریزده دالغالاندیریلماسی هر زاماندان داها یاخین گؤرونور.

شبهه سیز رئژیمین سون زامانلاریندا ساختا آلترناتیو و جایدیریجی گوندم لرله حرکتی اؤز مقدس یولوندان جایدیرانلار اولاجاق. اما میللتیمیز بوتون بو اویونلارین و پرده آرخاسیندا کیملرین اولدوغونو و نییت لرینی بیلدیگی اوچون سون قازانج شبهه سیز قهرمان آزربایجان تورک میللتینین اولاجاق.

یاشاسین ۲۸ مای جمهورییت بایرامیمیز!
یاشاسین گونئی آزربایجان قورتولوش مجادیله سی!

Your email will not be published. Name and Email fields are required